DÍA DAS BIBLIOTECAS

O vindeiro xoves 24 de Outubro conmemórase "O Día das Bibliotecas". 

Como agasallo aquí tendes un conto da escritora británica Mónica Hughes que, con seguridade, gustará a moitos de vós.

Acompañamos o conto de varias ilustracións feitas por alumnos e alumnas do centro.

Desde aquí moitas grazas a Kelly Domínguez, a Adolfo Dacal de 1º Bac B e a Zaida Casas de 3º ESO A, que cos seus debuxos representan este precioso conto.

Gozade dun día moi especial e felicidades desde a BIBLIOTECA do IES Lagoa de Antela!!!

O CLARO DO BOSQUE

Erase unha vez un grupo de nenos aventureiros que escaparon do Castelo da Ignorancia tan rápido como o permitían os seus pés. A noite véuselles encima, cos seus sons aterradores e as súas misteriosas formas fantasmagóricas, e acháronse no medio dun bosque escuro. Ao non poder ver cara a onde ían, abrazáronse para darse calor e protección e así permaneceron ata o amencer.

Cando saíu o sol, os nenos viron con sorpresa que se atopaban nun claro do que partían tantos carreiros, en direccións diferentes, que case era imposible contalos. Os carreiros tiñan curvas e recovecos de forma que non podían saber o que había ao final, soamente podían imaxinalo.

¾Eu irei por este lado —dixo un raparigo, e tomou un dos carreiros. Pronto chegou a unha cidade medieval de altas murallas e gallardetes ao vento. Atravesou valerosamente a súa gran porta de entrada, e naquel lugar correu grandes aventuras.

 —Este carreiro parece interesante —dixo unha nena —Non podo imaxinar o que hai á volta do recodo. Por iso, partiu noutra dirección e pronto se atopou nunha nave espacial, vendo como o sistema solar se facía máis pequeno, a medida que a nave avanzaba cara ao centro da galaxia.

 —Eu quero atopar unha espada máxica coa que vencer ao xigante malvado que nos tivo tanto tempo prisioneiros— exclamou un neno.

 —Eu tamén —e ambos tomaron outro carreiro, pensando dar batalla ao malvado xigante.

 —Gustaríame ver o mundo enteiro, coñecer todos os países e todos os seus pobos, escoitar os seus idiomas e xogar cos seus nenos.

 —E eu necesito saber como funciona o mundo. Por que caen as follas ao chan mentres que as estrelas permanecen no ceo. Quero sabelo todo.

Pronto se foran todos os nenos, excepto unha nena pequena. Mirou ao redor do claro soleado e aos diferentes carreiros, uns agora explorados e outros, esperando que alguén atope o que se oculta detrás dos seus recodos.

Puxo a súa man sobre a suave cortiza dunha árbore, dicindo en voz alta:

 —Este lugar é máxico. Desexo saber como se chama.

E o claro do bosque contestoulle: —O meu nome é Biblioteca.

Mónica Hughes

VISITA OFICIAL DOS GRUPOS DE 1º ESO

A pasada semana os grupos de 1º ESO realizaron a visita oficial á BIBLIOTECA do instituto.

Estas visitas organizadas polo equipo de biblioteca e os titores é algo habitual todos os cursos. Aproveitamos para dar as grazas a Herminia, Teresa, Suso e Elena polas facilidades para poder levar os seus alumnos e alumnas á biblioteca.

Coa visita "oficializamos" a entrada destes rapaces e rapazas neste espazo do centro que se converterá co paso dos meses nun lugar de referencia para todos eles.

Para deixar constancia do seu paso pola BIBLIOTECA fixémoslles entrega a todos do Carnet da Biblioteca coas cores corporativas, azul e laranxa, e tamén lles demos un tríptico deseñado coa intención de deixar claras as normas da BIBLIOTECA. Faise fincapé nas devolucións puntuais dos préstamos, o uso dos ordenadores, o uso da impresora e faise un percorrido pola biblioteca explicando a CDU para que saiban localizar o lugar donde están colocados os libros que buscan.

Recordamos normas básicas como o silencio na sala, deixar todo ordenado ao irse o non comer nela.

E para que quede constancia do paso destos alumn@s tan importantes para a nosa biblioteca, deixamos unhas cantas fotos para a posteridade.

Gozade coa vosa BIBLIOTECA e GRAZAS a tod@s!!!

NORMAS BIBLIOTECA

Agora que estamos comenzando é convinte recordar as normas da vosa BIBLIOTECA, para que todo funcione o mellor posible.

O triptico deseñado serve de guía e axudanos a conseguilo.

HORARIO USO BIBLIOTECA CURSO 2013-14

HORARIO USO BIBLIOTECA

Ola de novo! 

Aquí tendes o horario de gardas de recreos para que saibades en todo momento con que profesores-as podedes contar para os préstamos de libros e material da biblioteca o para que vos solucionen calquera dúbida referente á biblioteca.

 Non esquezades que estamos para axudarvos en todo o que precisedes!!

NOVOS AIRES NA BIBLIOTECA DO IES LAGOA DE ANTELA

NOVOS AIRES NA BIBLIOTECA DO IES LAGOA DE ANTELA

É grato comprobar como as novas xeracións de alumnos-as de 1º ESO veñen dereitiños á súa biblioteca sen tan sequera ter feito a presentación oficial da biblioteca curso por curso.

Cos anos algo está a cambiar, algo que notamos os membros do equipo de biblioteca e que nos axuda a continuar neste labor tan grato e necesario, mais cada vez con menos recursos e horas nos nosos horarios para cubrir tanta demanda.

A semana pasada nunha garda de recreo non demos crédito ao que vimos...a biblioteca a tope de rapaces e rapazas de 1º ESO, usando as instalacións e enteradisimos de todo porque, segundo contaban, os compañeiros de cursos superiores xa lles contaran como funcionaba ... e ademais xa veñen coa base dos centros da comarca da Limia, moitos deles integrados no PLAMBE...está claro que se nota o respaldo do labor dos profesores-as encargados das bibliotecas, nos seus coles de procedencia.

Tamén é grato comprobar como compañeiros que chegan destinados ao noso centro e que xa estiveron aquí hai moitos anos se sorprende do cambio experimentado na biblioteca e fáltalles tempo para facerse socios e de inmediato comezar a ler libros dos seus fondos que, agora, tamén son de todos eles.

E para mostra unhas cantas fotos deses momentos...que axudan un montón a todos os que estamos a traballar na biblioteca do IES Lagoa de Antela.

 Benvid@s!!!

HORA DE LER NO IES LAGOA DE ANTELA

            Como vén sendo costume dende fai tres anos, poñemos novamente en movemento a HORA DE LER.

            Xa comezaches con ela o pasado luns 30 de setembro e continuaremos  seguindo o horario para tal fin. Xa sabedes que o noso centro ten unha hora á semana de lectura.

            Para o novo alumnado de 1º ESO foi unha novidade, aínda que algúns xa a tiñan nos seus coles organizada de diferentes maneiras.

            Dende a Biblioteca queremos contarvos que para poder poñela en marcha tivemos a axuda fundamental de moitos dos vosos compañeiros da ESO que axudaron os membros do equipo de biblioteca a organizar as caixas que tendes nas vosas aulas.

            Recordade que a HORA DE LER é un dereito que tendes como alumnos-as e que está aí para que gozades con ela. Podedes traer as vosas lecturas favoritas para ler, empregar ese rato de lectura para avanzar nas vosas lecturas obrigatorias ou ben coller das lecturas que tendes nas vosas caixas nas aulas, iso si, mantendo as normas que xa sabedes.

            Esperamos que saquedes o máximo proveito desta actividade e tamén esperamos todas as suxestións que creades oportunas facer chegar á vosa biblioteca.

            BOAS LECTURAS PARA TOD@S!!!

BENVIDA Á BIBLIOTECA

Ola a tod@s e Benvidos un curso máis a vosa biblioteca!!!

     O novo equipo de biblioteca xa está traballando a tope para poder recibir aos grupos de 1º ESO e poder presentar oficialmente a vosa nova biblioteca, cunha visita guiada e preparando os vosos carnets.

     A biblioteca espéravos cos brazos abertos, gozade deste espazo e de todas as vantaxes de pertencer a una biblioteca coma a do IES lagoa de Antela.

     Xa estamos a preparar os días sinalados no calendario para facer diversas actividades.

     As lecturas obrigatorias xa están listas e todas as que queirades elixir están á vosa disposición. 

  

     Os clubs de lectura xa empezan a formarse, a Hora de ler xa comezou a súa andaina o pasado luns 30 de setembro.

     Contades con préstamos de ordenadores portátiles (xa comezamos co esa iniciativa o curso pasado) e tamén de libros electrónicos para o presente curso.

     Recordade que hai que devolver os préstamos de verán e as mochilas viaxeiras e formalizar os novos préstamos.

     Esperamos a vosas suxestións.

     Grazas a tod@s pola vosa participación e colaboración coa biblioteca.

FELIZ VERÁN LECTOR!!

Este curso, con máis de 3000 préstamos rebentamos as estatísticas, superando con creces o ano pasado. O éxito debeuse, sobre todo, a que dende o equipo da biblioteca incentivamos a lectura na aula noutras materias ademais das de Lingua e Literatura proporcionando información e libros ao profesorado. 

Optimizáronse recursos, empregando as mesmas lecturas en diferentes niveis e clubs en distintos tramos temporais, feito que favoreceu o acceso da comunidade educativa aos mesmos libros. Asemade, este compartir lecturas serviu como campaña de publicidade interna para favorecer o hábito lector fóra do circuíto académico. 

Para rematar, deixamos aquí unhas fotos dos usuarios da biblioteca realizando diferentes actividades no espazo lector e unha crónica sobre as mochilas viaxeiras da alumna de 3º de ESO e membro do club de lectura Uxía Peleteiro, elaborada para unha tarefa de Lingua Galega e Literatura.

FELIZ VERÁN LECTOR!!

AS MOCHILAS VIAXEIRAS INVADEN O I.E.S LAGOA DE ANTELA

A poucas semanas de que o curso remate e o verán chegue, os alumnos e alumnas do I.E.S Lagoa de Antela prepáranse para pasar unhas vacacións gozando da compaña dos libros.

Xa hai mais de 23 mochilas entregadas, e aínda non rematou o curso, por iso podemos dicir que a lectura entre os estudantes é todo un éxito.

Entre os xéneros máis destacados encontramos a ciencia ficción e a fantasía. Pola asombrosa  acollida que tiveron este ano as mochilas viaxeiras, moitos dos alumnos víronse na obriga de desprenderse dalgúns libros, con pesar. Tamén se ve que as rapazas e os rapaces realizan pequenos pactos entre eles para intercambiarse os libros.

As mochilas viaxeiras son todo un éxito. É moi fácil facerse cunha delas, tan só tes que acudir á biblioteca, elixir os libros que desexes, metelos na mochila e rexistralos, e xa podes levar a mochila, e gozar dos libros durante todo o verán.

Entre os autores encontramos a Laura Gallego, Paulo Coelho, Ana María Matute, Xulia Alonso Díaz....

Hai un gran abano de libros que escoller: ciencia ficción, fantasía, poesía. Podes encontrar o libro perfecto para ti, pasa pola biblioteca e elixe o que máis che guste.

Uxía Peleteiro, 3º ESO

LETRAS GALEGAS NO IES LAGOA DE ANTELA

Celebramos as Letras Galegas con múltiples actividades organizadas entre a biblioteca e o ENDL: varias escenificacións sobre a vida e a obra de Roberto Vidal Bolaño, concurso de creación teatral e a lectura do poema “Adiós ríos, adiós fontes” de Cantares Gallegos de Rosalía en varios idiomas. Tamén contamos coa presenza de Cándido Pazó que fixo rir e reflexionar o alumnado e o profesorado no Salón de Actos.

No blog do ENDL colgamos máis información e fotos das actividades.